أسامة فرحات يكتب: شوق الخلاص

ما تخافش من بكره وم اللي جايّ

شوق الخلاص بيغيّر المقادير

ينده علينا نبض شارع حيّ

الشعب هوّا صاحب التغيير

.  .  .  .  .

نسّم علينا الفجر بآدانه

ترانيم فرح تسري وتروينا

الشرقانين للعدل وميزانه

يغرس عيدانه في أراضينا

.  .  .  .  .

استبشر المحرومه والمحروم

لما برق م الشعب إصراره

أمر الرحيل للظلم كان محتوم

وبإيده شدّ من القضا نهاره

.  .  .  .  .

رعرع مع الشمس العفيّه عليل

ياما اكتوى والظلم كيّل له

من لهفته يلقاله مرّه سبيل

الدفّه جت حدّه تميّل له

.  .  .  .  .

ترجع مواويل الفواعليه

تسري ف عروق الأرض تتغندر

والنيل يزقزق تضحك الميّه

تملا شباك الصيادين مرمر

.  .  .  .  .

عاد الأمل نوّر شوارعنا

من دمّ شهدانا سقى الثوره

تِعلا وتجرف كل من باعنا

واللي استباحوا يسرقوا بكره

.  .  .  .  .

بكره اللي عايزينه بايدينا يكون

ولا حدّ ينزع مصر م الأحضان

طول ما الكرامه منوّره في العيون

المصري مستقتل يعيش إنسان

.  .  .  .  .

ما تخافش من بكره وم اللي جايّ

شوق الخلاص بيغيّر المقادير

ينده علينا نبض شارع حيّ

الشعب هوّا صاحب التغيير

.  .  .  .  .

تابع القراءة