يا سنين يا جايه بامد إيدي بالسلام والنور
وبادور كما الطور في ساقية حلمك المبدور
أطرح قصايد بدور... يطرحني ليلك ضيّ
وأتخطى فوق الليالي والمصاطب حيّ
وأصرخ في وش اللي كاره روحي: حالف جيّ
مصري الطباع والملامح والبدن منصور
.........
جاي يا ضواحي الغلابه يا سكّة العشاق
جندي ف فريقها المرابط والبارود ترياق
ومحبتي دولتي... وف قبلتي كعبتي
حاسب حساب حسبتي وطالع من الأنفاق
وطني صبح جبتي... وف سكّتي مأمور
.........
يا سنين بأمر المحبه بامرّ زي الريح
راكب حصانك زمن وجموحك المراجيح
مضطر ع اللي انفرض ومهادن التماسيح
لا باخاف ولا سِبت يوم سمنة كلامي تسيح
مصري النبي والمسيح والجدّ كان مبرور
......
صاين جميع المفارق والطرق جواي
وكإن كنت الوطن... والباقي كانوا معاي
بانسى ساعات كل شيء رغم إني مش نساي
يا عم أبنودي (-قعمز- جنبي واشرب شاي)
لسّه الليالي العفيّه بتجبر المكسور
........
آمين على كل شيء ممكن يكون وطني
آمين ورا كل من قال الوطن وطني
آمين يا طير السما يا حرّ من وطني
آمين ومؤمن قوي ومغزى الإيمان وطني
عايش ببركة مواطن روحه كاسره السور
........
وباحبها زي ماهي وزي ما تقرر
بنت اللي كتبوا التاريخ بالدمّ متحرر
ولا حد فسر لنا مغزاها أو برر
ست البراري البريّه ودمّها مكرر
سكّر وأنا اللي انضرب بالذِّكر والمذكور
.........
يا سنين بترمح كما الرهوان على قلوبنا
قبل التاريخ اتكتب فوق روحنا مكتوبنا
مصري وجميعنا انفطم ع العشق لم توبنا
هو اللي تصفاله ناعسه يتوب يا أيوبنا
توبنا اتغسل بالكلام... يا نهار وجاي بالدور
.......
بتلف ع اللي انكوى واللي اغتوى بيها
وبتتوهب للمريد ولبدر ناشيها
حلواني كان ابن حنت وصورته ف عنيها
نوّار يا وش الحبيبه يا خير حواريها
وانا عشقي فاق اللي فيها وفُورة التنّور
........
يا سنين بترحل وتتسحب وراها سنين
حنيّة الأرض فاضت جوّا قلبي حنين
زرعتني ياسمين وفل ونوّرت لي يومين
ف كشفت عنّي الوجع وخلعت توب الطين
ومشيت ف حضرتها شاعر مفتري ومعذور
..........
بالحب والورد والأحلام وطعم القمح
بارمح على آخري لم ملّيت في يوم الرّمح
وارمي بقوايا اللي فيا كأني باحدف رُمح
شايفك مواطنه ف وريدي و(باشربك -باللّمح-)
ف إيديا حبّة حطب وف جنّتك عصفور
........
يا سنين يا فايته بهداوه كإنها مشاوير
طول عمري نفسي احضنك واركب هواكي واطير
وارفض ف عشقك قيود الرفض والمحاذير
وارمح كأني الأمير الماشي وسط كتير
وازأر زئير عسكري فوق جبهتك مندور
بيمد إيده لحبايبك بالسلام والنور
مصري الطباع والملامح والبدن منصور
0 التعليقات:
إرسال تعليق