سعيد شحاتة يكتب: شراع الليل

ما تحطش
آخر حتة حب ف قلبك جوّا رغيف
ولا ترسم طيف
 على باب القاعه المتوارب
ولا تطلع برّه تحارب حدّ
المدّ بلاد
وإيدين الأسياد سانده الدّار
والغار الساكن جوّا حشاك
ما اندقش فيه ولا طبلة زار
والتار مشوار وسلاح صاحي
أنا أحبك وإنت بتضايق
وبحبك ومزاجك رايق
وبحب عنيك بتطق شرار
من نار الطبع الفلاحي
وبحب إيديك لما تناحي ف وتر الأيام
لو نفسك توصل يم هناك
بص لقدام
وازرعني نهار على آخر شوفك
أشوفك مدنه وبرج حمام
وأبدر لك ميت فدان بكلام مليان تخاريف

ما تحطش آخر حتة حب فـ قلبك
جوّا رغيف للناس الدون
ولا تعمل مجنون في الأحوال المقلوبه
أنا ضدك
لما تكون في بؤونه
وخلق الله عايشه فـ طوبه
وأنا ضدك لما تحاول تلغي معاني الكلمة المكتوبه
وأنا ضدك
لما تحاول مره
تدوس على حلمي المتفسر
وعدوك
لما تبصّر ورق البلّك بالشيّاب
وتراهن بكلام الكتاتيب
ع العمّه وعلى شيخ الكتّاب
وينبّت قلبك بدل الحب
تقاوي كلاب تنبح جواك
وطيور أسود من شعر صبيّه بتستناك
علشان تدّيك وردة ياسمين
أنا مين وإزاي
وإزاي وأنا مين؟
أنا واحد شبه البني آدمين
بيخاف م النور
وبيعشق لون العتمه
اللي بترقص في جيوب الدور
وبعيش جوا المكن المهجور
المرمي فـ حضن البرّيه
وبحب عيون الغجريه
اللي بتعزف ناي
للشاي الطايب ع الجمرات
وإيدين الجدع اللي بتزرع
وبتقلع بشويش الحطبات
أنا ضدك
 لما تحب مرات عمك أيوب
وأما تعيش زمنك بالمقلوب
وأما الناس تحدف فيك بالطوب
وتحن لهم
وتحنّي لهم قلبك ف رغيف
إزاي وعنيك
عماله بتلمح طراطيف دمك
جوا كعوب الهجامه
ودماعك لسه بيروي طوبات الرجامه؟
إزاي هتحن
لفكره قديمه وهدامه
وبتهد جبال؟
أنا صابر زيك ومسالم
وطويل البال
وحرام إني أربط مهري فـ ضهرك
وأعمل على راسك خيال
وحلال إنك تنقشني قتيل
على ورق التين
أنا مين وإزاي
وإزاي وأنا مين؟
أنا واحد ماشي بطول الحيط
لا سابتني أسود القصر أضحك
ولا كلب الغيط!
يا شراع الليل يا غويط يا غويط
أنا ليه هربان جواك دايماً زي الوطاويط
وعبيط بيعافر ع الدفات
التعلب فات واللا اتأخر؟
وأنا صاحي وراك واللا بشخّر؟
يا شراع الليل
يا طويل يا غتيت
يا أبو ميت حدايه
وميت عفريت
يا شراع الليل
يا طويل يا هبيل
أنا فيك وطواط
واللا أنا قنديل!؟

تابع القراءة

سعيد شحاته يكتب: مش ذنبك

أنا قلبي يشبه قلبك الطاهر
موجوع من الأباليس ولاد الكلب
جسمين يا بنت الثوره والميادين
جسمين ولكن فينا نفس القلب
..................
غمّيت عيوني عن البشر ومشيت كما العميان
حسّست ع التماثيل ولا تمثال نطق
صليت ورا شيوخ المقام وطلعت مغفور لي
شفتك نسيت الفرحه بالغفران وبشيوخ المقام وبثورة العالم على التماثيل
لسه الدليل تايه في سرداب السما الفضي
والسكّه مِلك البياعين والأرزقيه وآلهة فروعون
قلبك منين يا بنت يا امّ الوش م الجنّه
روحك بتطلع فين
الذنب ذنبك واللا ذنب الكدابين والمضروبين بالصمت والذلّه
الذنب ذنبك واللا ذنب المضروبين بالدين وبالملّه
الذنب ذنبك واللا ذنب بلاد زلط ومعاني محتلّه
فاتت على روحي الملامح زي كرباج شق ضهر المغرمين نصين
مرّيت على عنيكي الوساع ساكت
مر الجميع ساكتين
مرّرت إيدي على الدموع مالقيتش غير دمّي اللي سايل فوق خدودك سُخن
زي العَرَق فوق جتّة البراكين
زي اليمين الكدب
زي الحجاره الواقفه تشرب من ملامحنا الشبه والحزن والحرمان
زي الإيمان المُدّعى من مدِّعِي الثوريه في العالم
يا بنت روح الأرض والغابه وحنايا العشق في العاشق
يا طيره كاشفه الزيف بمخلابها الضعيف
واجعاني ريحة جسمك المضطر ع الأسفلت
ضحكة عنيكي الملهمه الصافيه
أوجاعك الحافيه
واجعاني لمسة إيدك الدافيه لخلايا الطين
الذنب مش ذنبك ولا ذنب البيوت المجبره ع الصمت والساقعه
الذنب ذنب اللي انحنى وانذلّ
ذنب اللي ضلّ الناس عن الحق المبين
ذنب اللي قال للدم في الميادين “آمين”
عدّيت على وشّك ما سلّمتش ولا قولتش بلاد مستهلكه وفارغها
أذنبت بِسكوتي ورضيت بالخوف
غمّضت عيني وبرضه لسّه باشوف
قادر أميّز كل شيء بالعقل والمنطق
ما عادتش فارقه التوهه في العناوين
مرّيت على عنيكي الوساع ساكت
مرّ الجميع ساكتين
مرّ العيال متعصّبين بالصوت وبالملكوت
مرّ الخليفه ف جبّته النبّوت
شاور ولا سلّمش
عاتب جميع الناس ولا اتكلّمش
علّمنا نضحك لك ولا اتعلّمش يضحك للبنات في مواكب الأُمرا
يا بنت يا ام الوش مرمر والجبين قمرَه
يا نَبْت قِمريّه
يا طرحة المساكين يا جِنيّه
صلّيت ورا شيوخ المقام وياكي في الزاويه
حطيت إيديّا في كفّك الوردي
وخلصت من إمدادك الأرضي
ووقفنا نضحك وإحنا في المعراج
روحك في قلبي وقلبي صار "حلاج"
..................
ما أنا قلبي يشبه قلبك الطاهر
موجوع من الأباليس ولاد الكلب
جسمين يا بنت الثوره والميادين
جسمين ولكن فينا نفس القلب

تابع القراءة

سعيد شحاته يكتب: ضد الوزير القذافي

حافي ف وطن محني وحافي 
والدنيا حاطه على كتافي 
مصري الميلاد وخنقتوني
علشان يا صيّاد يا اسكافي 
.........
حافي ف وطن سلّم راسي 
لبتاع سرق حتى لباسي
الكلب سلّم على سيده 
وادّاه ملامحي وأوصافي 
...........
حافي ف وطن طلّع ديني 
وسرقني من بيني وبيني 
متوضي لكن مش طاهر 
وصلاتي كات بالكتّافي 
...........
حافي ف وطن أصله لمونه
مجنون ببنت المجنونه 
إياكش بكره يلمّونا 
والتهمه تطلع نور طافي 
......
حافي ف وطن مستهويني 
وسارقني لكن على عيني 
إني ألعنك وأنت "خُميني" 
تطلع قريني وسيّافي 
......
حافي ف وطن محني وصامد
ساعتين عسل وساعات حامض 
سمّاني أبويا سعيد حامد 
وادّاني قلبي ومجدافي 
.......
حافي ف وطن ضيّق ضِيقي 
وخطف صابونتي وأبريقي 
أنا عندي أبقى موزمبيقي 
ولا أكونش في رحابها "موافي"
........
سمّاني أبويا سعيد حامد 
ودعالي أكون صافي وغامض 
وان يوم هتفت أهتف جامد 
ضد الوزير القذّافي 
...........

تابع القراءة

سعيد شحاته يكتب: العسكري محمد حسن عطوه

      يا أيها النيل اللي في عروقي 
      يا أيها الدمّ اللي جاب النصر
      أنا كنت واقف والكنال طوقي
      كان نفسي أكون لزمايلي دانه وجسر
      كان نفسي أكمّل والمدد شُوقي
      لكن وصلت الجنّه قبل العصر
      كل العساكر دبدبت فوقي 
      وانا روحي هيمانه ف ملامح مصر

      العسكري "محمد حسن عطوة"
      آخر شهادة نصر في رمال السويس
      آخر عريس اتزف من سينا
      آخر ضلوع رافضه ف مراسينا الخنوع والذلّ
      رافضه الوجود للخاين المحتل
      رافضه العلم لو مال في راس التل 
      رافضه السكوت والموت ينسّينا

      العسكري محمد حسن عطوه
      الموت ما بيسمّيش 
      والصرخه في الأندال ما بتصحّيش 
      وكلام حبيبتي الساكته ما بيحمِيش
      وانا ماشي شايل روحي ع المدفع
      وكأني شايل روحي في شوال خيش
      يا ضهري يا محني 
      نفسي الغريب في الغربه يلمحني
      نفسي الديار تبعت تروّحني 
      نفسي اتخلّق في الجنه لقمة عيش
      علشان ولادي ف أرض مصر تعيش

      العسكري "محمد حسن عطوة"
      والخطوه فوق الجته أتقل م الجبال
      لكن ثباتك في الرمال شيمة رجال 
      شيمة الجمال الماشيه... تقرا الفاتحه
      وتصلّي الضحى ع البرّ
      شيمة جدع مؤتمن ملى للصبايا ومرّ
      شيمة ممر ف قبضة الخاين
      صدقني يابه الدم مش هاين 
      والصبح باين على آخر مدى للشوف
      يا اللي بظهورك قتلت العادي والمألوف
      وأسرت قلب ألوف... وكسرت قلب ألوف
      خلّيت ضمير الوطن من طلّتك مكسوف 
      وقبلت تحلم بعيد وإحنا اللي نايمين خوف
      دلوقت قادر أقول للي انحنى وسابك 
      التار جنابك بتاعه هناخده ع المكشوف

      العسكري "محمد حسن عطوة"
      "سكت الكلام" 
      والبندقيه ما حددّتش الطلقه رايحه لفين
      ولا نبّهتني الريح هتخطف مين
      الورد داير ع الشطوط يرمح
      وانا وانتي واقفين ع الطريق أسدين 
      رغم إننا ضعاف البدن سادّين
      وشّين كما البدرين
      متوضيين م الحلم ومسالمين
      الليله ليلتك يا حسن عطوه
      الليله ليلتِك يا امّ دلاّيتين 
      يا فاطمه يا بنت النبي يا حسين 
      الورد داير ع الشطوط يرمح
      الأرض واحده وجدرنا في الطين
      بس الأكاده لكل عنقود دين
      لكننا واحد ومتحدين

      العسكري "محمد حسن عطوة"
      ابن التراب المصري صوت الناس
      ابن الغلابه اللي انحنوا بالفاس
      ابن اللي حنى إيديه بطين النيل 
      وزرع ملامحه وحاكم النخاس

      العسكري "محمد حسن عطوة"
      يا فرحة المدفع على كتافي 
      خفّت حمولي ف حضنك الدافي 
      أنا مش قتيل... أنا جاي من سينا 
      جاي مبتسم... رغم إني جاي حافي

      العسكري "محمد حسن عطوة" 
      وكلامنا يا تراب مصر مش للبيع 
      مش الحرامي وحبّة المفاجيع
      ولا للي حطّوا البلد على هامش المواضيع 
      ولا للي وطوا وباعونا ف حفلة التطبيع 
      الكلمه زي السيف على الكداب
      والنصر نايم تحت عقب الباب
      وانا وانت يا محمد حسن أصحاب
      من يوم إيدينا ما شالت القبقاب 
      ووقفنا بيه لمواجهة الجرابيع 

      العسكري "محمد حسن عطوة"
      في الدوشمه قال القائد الأعلى لكتايب ربّنا 
      الراس كما المدنه 
      والصوت كما صوت الأدان 
      والموت عشان أرضك إيمان 
      فان متّ موت واحد صحيح 
      واقف على ضهر الحصان 
      الأرض ما بتولدش دون 
      والنيل ما جابش معاه جبان 

      العسكري "محمد حسن عطوة"
      "بلدي وإن جارت" أنا موافق ومش مضطر
      ولا ناوي أبيع وأهرب مع اللي اتغرّ
      أنا أموت كما محمد حسن عطوه 
      وأرقد في رمل السويس خمسين سنه في الحرّ

      العسكري "محمد حسن عطوة"
      في الدوشمه قال القائد الأعلى لكتايب ربّنا 
      دمّك فدا تراب أرضنا 
      وعشان كدا 
      قررنا في الخندق نغيّر وشّنا 
      وندوس على عرق الضغينه ف قلبنا 
      ونبوس ترابها ونتبدر زي الشراقي العطشانين 
      زي الأيادي الشقيانين 
      زي الضماير لمّا تكويها السنين 
      زيّ اليمين الحُرّ لحظة أنْسنه
      نسقي الشراقي الطاهره من فيض دمّنا

      العسكري "محمد حسن عطوة"
      ما اعرفش كانوا ولادي عاملين إيه 
      كِملت حياتهم كِيف بدون الأبّ
      أنا سِبتهم ع الأرض وحدِيهم 
      لكني سايب فوق سماهم ربّ

      العسكري "محمد حسن عطوة"
      علّمتنا نحلم 
      علّمتنا نتوضى بالإصرار 
      علّمتنا نعيش في الحياه أحرار 
      علّمتنا نتحلّى بالصبر المرار 
      لو أجبرونا على القرار بالنار 
      علّمتنا لمّا السما تمطّر 
      نِفحَت بدنّا ونتخلق أنهار

      العسكري "محمد حسن عطوة"
      الشهقه صعبه ف لحظة المعراج
      والدود بينخر في السنان العاج
      وانا تحت باطك ماشي متحمّل 
      وكأني آخر صرخه م الحلاج

      العسكري "محمد حسن عطوة"
      زفّوه لعرشه ف جنته ف فاقّوس
      واقروا لحبيبته العفيفه الفاتحة ع العفّه 
      وقولولها كان فارس بعزم القلع والدفّه 
      فلاح من الفقرا 
      وقّف جميع الدبابات بسلاحه ع الضفّه
      حارب عشان العدل والكفّه 
      زفّوه لعرشه ف جنته ف فاقّوس
      ويا ريت حبيبته تجهّز الزفّه

      العسكري "محمد حسن عطوة"
      قلبي الوجيع ساكن 
      دراعاتي بترفرف في دنياكي
      ابيّض وشي بلونك الداكن
      فرحان وانا في الجنّه بالكاكي

      العسكري "محمد حسن عطوة"
      بدأ التاريخ بالدمّ وهينتهي بالدّم
      والروح هتفضل واقفه جنب اليمّ
      تغسل وشوش اللي انخرس صوتهم
      وتوطي راسها لكل دعوة أمّ

      العسكري "محمد حسن عطوة"
      اتطمني يا امّه
      أنا كنت رايح أمثّل الأمّه
      وارقص معاكي هناك على شط السويس
      وارجع عريس... رغم اني ما رجعتش
      اتطمني يا امّه
      أنا كنت شبعان بيكي ولا جُعتش
      وعشان أغيظ أعدائي وافرسهم 
      دخل الرصاص في حشايا.. ما وجِعتش

      العسكري "محمد حسن عطوة"
      يا صرخه بتهزّ الجموح فينا
      يا أيها القابض على سلاحك 
      يا ورد شايلينك على إيدينا
      دمّك ما زال على كفّ سفّاحك
      والحلم مقتول فوق كراسينا 
      يكفيني أعيش العمر مدّاحك 
      واحكيك هلالي لناس قهاوينا

      اتطمني يا امّه
      أنا كنت آخر صرخه في وشوشهم 
      آخر دراع اتمدّ في كروشهم 
      آخر أسد مطلوق على عروشهم 
      أنا كنت آخر جندي بيعافر 
      أنا كنت أول طلقه في نعوشهم

      أنا كنت واقف والكنال طوقي
      كان نفسي أكون لزمايلي دانه وجسر
      كان نفسي أكمّل والمدد شُوقي
      لكن وصلت الجنّه قبل العصر
      كل العساكر دبدبت فوقي 
      وانا في انتظار ضحكة ملامح مصر

      العسكري "محمد حسن عطوة"
      آخر عريس اتزف من سينا
      آخر إمام قام للصلا بينا

تابع القراءة

سعيد شحاته يكتب: إلى الريّس

إلى الريّس:

مساء الخير

مساء الصمت في النعناع

وضغط الدمّ في المواتير

مساء السكر العالي

ووطن بيوطي للوالي

وعبيد بيرخّصوا الغالي

وأيادي بيدعوا للطراطير

مساء الذلّ والضلمه

وعلَم بتحرّكه العالمه

وخطيب بيحوّر الكلمه

ومنابر جاهزه للتبرير

مساء النومه في الشارع

وريّس في الخُطب بارع

وحارس مفترى وفارع

وشعب بقوه بيصارع

فتيل الشرخ والبواسير

إلى الريّس:

مساء الخير

أنا الشعب اللى كان قادر

وأنا الشعب اللى ناوى يصير

وانا الشعب اللى لو حاول

هيجبركم على التغيير

ولو أخّرنا أتباعك

ما بنملّش من التأخير ...

وما بنزهقش م الفوضى

وما بنرضاش بطعم الزيف

وبيْبان إننا بنرضى

وبنصدّر لحكّامنا إننــا مرضى

ولمّا يصدّق الحاكم

نصير المعضله العارضه ف زوايا الكون

إلى الريّس:

كفايه ديون

مساك يشبه عصا موسى

ومعالم سطوة الفرعون

وصمت الطيبين والطين

وضحك عساكر المأمون

مساك يشبه نهار معجون فى تشط أمّى

مساك يشبه بنات عانس

وبيت بيصلّى ويسمّى

وناس تقرا الكلام بالليل

وتصبح تستبيح دمّى

أنا الشعب اللى بيعـــارض

وأنا ابن الرومى والفارض

وأنا القطر اللى داس ع الموت

وانا النيل لمّا يتمـــــارض

مساء المارد الفارد شراع الموت

إلى الريس بعلوْ الصوت: ما عادش سكوت

ما عدناش ننحتك تمثال

ولا نسخّر لك الملكوت

ولا نضرب لك الأمثال

ونستسلم عشان القوت

ولا نوهب بيوت المال

ملامح حلمنا المكبوت

إلى الريس بعلوْ الصوت:

ما عادش سكوت ولا ترحال

ولاد الأرض نبت الطين

وقاعدين فيها عمّ وخال

ومش هيهمنا رجالك

ولا هيهزنا الأندال

ولا هتحرك الساكن

بأوتار الخطابه العال

ولا مجازات ولا استعارات

ولا كنايه ولا إبدال

ولا عيّل هيتمرّد

وهيجيبه الحرس فى شوال

ولا مسكين هيستنظر

يموت على حجره ست عيال

ولا خيّال ولا شيّال

ولا ستّى اللى خالعه الشّال

ولا بنوته بضفيرتين

ولا قمرايه فى الإسدال

ومش هيهمّ مين فارس

ومش هيهمّ مين طبّال

رجال والأرض مرسانا

ندوس الصخر يتحوّل

رصاص بالقدره جوّانا

ونبدر ضحكنا يزهّر

قصايد حب دفيانه

ونهتف ينطلق مدفع

ونصرخ تنفجر دانه

بنتحرّك معانا الله

وقدرة شعب بيحاول

يغطّى العوْره بالإكراه

بيتوضى بغناوى النور

ويغسل نفسه من جواه

بنتحرّك معانا الله ومش خايفين

ولو حسّينا بالجبروت

هنطلع بالزتون والتين

مافيش صلصال يخاف صلصال

ولا تراب يترعب من طين

معانا الله ومش راجعين

ولو دهسونا فى الميادين

هنصعد للسما حافيين

هنطلع نخلع الأبدان

وننزل روح فى ناس تانيين

تابع القراءة

سعيد شحاته يكتب: هياتم رئيسه

هياتم رئيسه

وعمّك مخيمر بتاع الهريسه هيصبح رئيس

وكل اللى عايز هياخد ويشبع

وكل اللى جايز هيصبح عريس

وكل العجايز بتوع الجنايز

هيرموا العجز عند أول هويس

وكل اللى هلل وكل اللى دلّل

وكل اللى فسّر وكل اللى حلل

وكل اللى مرّر هياتم وعلّل

هيركب بولاق من محطّة باريس

جميع المشاكل هتطلع هياكل

وشعبك هيرقص هناك ع الشناكل

وعوكل هيجمع جيوش العواكل

وهيزفوا روحك فى سوق الخميس

وبوجى الحلانجى

وعلى المكلمنجى

وهدى (المصطبنجى)

وحسن واد عويس

فخليك طبيعى

وسُخن وطليعى

وهين المطر بالهدوم الربيعى

ولا تقول فى يوم الدماغ اشتراكى

ولا تميل فى صف النظام الـ"بديعى"

ولا تموت مناضل ولا تعيش حبيس

وحاول تشكك فى دارون وهيجل

وتعمل مريجل فى وسط السنيجل

وتمشى العريجل فى صفّ السريس

ولو وقفوك قول لهم: إنى راجل

ولو وضبّوك قول لهم: بس كيس

ولو قالوا إن البشر أصله بطّه

فلازم تقول البشر أصله تيس

*****

هياتم رئيسه

وعويصه الحلول

قطعنا الدماغ اللى غرّب وخرّب

وسيبنا الميدان للكلاب والديول

وسلّمنا سيفنا لزعيم الفلول

فسلّط علينا العرس والتعالب

وحطّ المخلل على ام الخلول

واعلن هياتم

فى عز المياتم

ورنّ الصاجات قبل دقّ الطبول

يا نيل الفرح والوجع والخيول

دمانا اللى سالت

وروحنا اللى شالت

وكل القلوب اللى صالت وجالت

مصيرها الأكيد الوجع والأفول

سنينكم هتصبح أكيد فصل واحد

عشان المعلّم هيلغى الفصول

ونيلكم هيصبح أكيد شط واحد

عشان العموم والحموم والشمول

وصف العساكر أكيد صف واحد

عشان الرصاص اللى يفلت يطول

هياتم رئيسه

وقديس فى جامع

وشيخ فى الكنيسه

ومصر البطل

واللا مصر الفريسه

وايه اللى ممكن

وايه اللى جايز

فى وش اللى عايز يغذى السيول

وإيه اللى وارد

فى وش اللى فارد

شراع اللى يصبر أكيد راح ينول

*****

هياتم رئيسه

وسنتكم كبيسه

وبناتكم حبيسه ف بارات العوازل

هياتم رئيسه

وطينيتكم رخيصه

وبلدكم هتدخل نطاق الزلازل

هياتم رئيسه وجميع المنازل

هتصبح مهازل

هياتم رئيسه وساعات التنازل

ما فيش حد نازل

ما فيش حد هيغازل المدفعيّه

ما فيش حد هيشيل معاه بندقيه

ما فيش حد هيموت عشان يبقى ميّت

ولا حد هيعيش عشان القضيّه

ولا حد هينام ويحلم ببكره

ولا حد هيحطه فى الجلابيه

يا بكره اللى واقف بيحلم معانا

يا أمس اللى ودّعنا م المغربيه

بلادنا اللى كانت هديّه وامانه

باعوها ف مزادهم وخبّوا الطاقيّه

وحطونا بعد الوجع والإهانه

فى صندوق وطن صمموه للضحيّه

*****

هياتم رئيسه..... وبدلة هياتم

هتصبح علم أو شعار جمهوريه

وخلخال هياتم نشيد للوزاره

وضحكة هياتم هتاف ثورجيه

وأسطول هياتم أكيد والمؤكد من الطبلجيه

هياتم رئيسه وسلام بلطجيه لرئيسة المكان

وطبعا زعيم الصحافه المبجّل

هيبدأ يغازل طعامة زمان

وجايز هياتم تفكر وتكتب

تاريخها العظيم اللى هزّ الميدان

وميت ألف شاعر هيمدح ويشكر

وميت ألف شاعر هيقرا البيان

وميت ألف كاتب

وكلب المصاطب

هيعمل هياتم رئيسة الديوان

وكان يا ما كان والرئيس صولجان

هياتم زعيمه وكريمه وحليمه

وسليمه، وغنيمه، ورحيمه، وعليمه

وهريسه وبسيمه، وعسل بالكريمه،

وعروسه وحصان

وكان يا ما كان واللى كان انفتاح

هياتم هتطلع فى آخر المسلسل ضحيّة صباح

هيعلن سيادته إن رقصة هياتم شرف أو كفاح

ولو ع التاريخ، فالتاريخ مستباح

هياتم رئيسه وسلمْلك سلاح

وانبطاح للأمام

علينا وعلى الدوله أعظم سلام

علينا وعلى الدوله برجين محبّه

ودرجين كاكولا وصينية حمام

نعيش مش هتفرق

نجوع مش مهم

نموت مش مهم

نقف فى الميدان نترعش مش مهم

يسيل دمنا ع السكك مش مهم

ولكن مهم إننا نبقى واحد

ونهتف عشان الفراخ والسلام

هياتم هياتم

هياتم هياتم

هياتم وفيفى وتمامكم تمام

هياتم ولو حد عايز يناضل

يرشّح بديل زى عادل إمام

تابع القراءة